Në orën 03:00 të mëngjesit të së dielës (25 tetor), akrepat e orës do të kthehen 60 minuta pas, duke shënuar kalimin nga ora verore në atë dimërore. Ky ndryshim bëhet çdo vit të dielën e fundit të tetorit, kur ora kalon nga 03:00 në 02:00.
Në Europë, ndryshimi sezonal i orës u përcaktua me një direktivë në vitin 1980, e cila u zbatua në vitin 1981. Prej vitesh, Bashkimi Europian diskuton mundësinë e heqjes së këtij sistemi.
Në vitin 2019, Parlamenti Europian mbështeti propozimin për t’i dhënë fund ndryshimit sezonal të orës, por zbatimi i tij kërkon një qëndrim të përbashkët të shteteve anëtare. Deri më tani, nuk është arritur një marrëveshje përfundimtare për këtë çështje.
