Ish-ndihmëssekretari amerikan i Shtetit, James Rubin, ka vazhduar dëshminë e tij në Dhomat e Specializuara në Hagë, duke folur për disa prej figurave kyçe të Ushtrisë Çlirimtare të Kosovës.
I pyetur nëse Jakup Krasniqi, Shukri Buja dhe Sokol Bashota ishin pjesëtarë të moderuar të UÇK-së, Rubin u përgjigj shkurt: “Po.”
Ai shtoi se personat që kundërshtonin Marrëveshjen e Rambujesë ishin, sipas tij, të gatshëm të shkaktonin masakra: “Por nga ana tjetër kishim persona të moderuar si Thaçi e Krasniqi që ishin të gatshëm të nëshkruanin Marrëveshjen e Rambujesë. Mirë që nuk i dëgjuan fjalët e ekstremistëve,” u shpreh Rubin.
Në vijim të dëshmisë, ish-diplomati amerikan theksoi se nuk është gjetur asnjë provë që katërshja e UÇK-së, apo drejtues të tjerë të saj, kanë pasur qëllim të ekzekutojnë apo të vrasin njerëz.
