Një grup prodhuesish të qumështit kanë protestuar sot duke derdhur sasi të konsiderueshme qumështi në lumë, në shenjë pakënaqësie ndaj situatës së krijuar në sektor.
Sipas tyre, protesta vjen pas ndalimit të grumbullimit të qumështit nga qumështorja “VITA”, një situatë që ka zgjatur tash e tre ditë dhe ka shkaktuar humbje të mëdha për fermerët vendorë.
Prodhuesit kanë kërkuar nga Ministria e Bujqësisë dhe Agjencia e Ushqimit dhe Veterinarisë që të publikojnë rezultatet e analizave të mostrave të marra në muajt prill dhe maj 2026, duke kërkuar transparencë të plotë mbi situatën.
Ata kanë paralajmëruar se, nëse nuk ka zgjidhje dhe reagim institucional, protestat do të zhvendosen edhe në Prishtinë në ditët në vijim.
Fermerët theksojnë se mungesa e grumbullimit të qumështit po rrezikon seriozisht mbijetesën e tyre dhe të gjithë zinxhirit të prodhimit vendor.
