Pas lajmit të hidhur për ndarjen e papritur nga jeta të këngëtarit të njohur Shpati Kasapi, artisti Blero ka bërë një reagim prekës dhe plot emocione, duke nderuar figurën dhe kontributin e tij të madh në muzikën shqiptare.
Në postim, Blero thekson se Shpati ishte një prej artisteve më të shquar të fillimviteve 2000, një zë i veçantë dhe një figurë që la gjurmë të pashlyeshme në skenën muzikore shqiptare, përcjell Indeksonline.
Ai kujton se gjenerata të tëra të rinjsh janë rritur me këngët e tij dhe janë frymëzuar nga arti i tij, duke e vlerësuar me nostalgji dhe respekt kontributin që ka dhënë ndër vite.
Duke shprehur tronditjen e madhe që ka sjellë ndarja e tij e parakohshme, Blero shprehet se do të ishte njerëzore që dita e nesërme të shpallet ditë zie, në nderim të jetës dhe veprës së artistit.
Sipas tij, shpallja e një dite zie do të ishte një akt respekti ndaj figurës së Shpat Kasapit, si dhe një mesazh solidariteti me familjen, kolegët dhe mijëra qytetarë që e kanë dashur dhe vlerësuar për muzikën dhe ndikimin e tij.
