Përfaqësuesi i GUXO-s, Faton Peci, ka deklaruar pas takimit të liderëve politikë se diskutimet rreth krizës politike u zhvilluan nën një atmosferë që u paragjykua si farsë nga disa pjesëmarrës, madje pa nisur ende debati.
“Nuk duhet të bëhemi pjesë e ‘fontanës së dëshirave’ për interpretimin e aktgjykimit të Gjykatës Kushtetuese,” tha Peci, duke theksuar se interpretimi i vendimit duhet të bëhet në përputhje me afatet dhe përmbajtjen e përcaktuar nga vetë gjykata.
Ai bëri të ditur se gjatë takimit janë prezantuar dy propozime për zgjidhjen e ngërçit institucional, ndërsa ai vetë ka paraqitur një ide konkrete.
“Kam propozuar arritjen e një marrëveshjeje politike për zgjedhjen e kryetarit dhe nënkryetarit të Kuvendit, duke u bërë pjesë e një pakoje të përbashkët për dalje nga kriza.”
Peci u shpreh se mbajtja e tryezave të tilla është hap pozitiv, por kërkoi që fokusi të jetë në zgjidhje të qëndrueshme dhe jo në deklarata të paqarta.
