Prokuroria Speciale ka ngritur aktakuzë ndaj katër personave me inicialet B.R., B.H., R.Q. dhe N.L., nën dyshimin për veprën penale “Keqpërdorimi i pozitës apo autoritetit zyrtar”.
Sipas aktakuzës, të pandehurit, në cilësinë e zyrtarëve të Ministrisë së Infrastrukturës, dyshohet se gjatë periudhës nga 2 gushti 2017 deri më 26 nëntor 2020 kanë tejkaluar kompetencat e tyre dhe nuk kanë përmbushur detyrat zyrtare lidhur me kontratën “Mirëmbajtja e Urave në Rrugët Nacionale dhe Rajonale të Kosovës për vitet 2017–2019”.
Prokuroria pretendon se aktiviteti i prokurimit ishte iniciuar me vlerë të parashikuar prej 500 mijë eurosh, ndërsa në fund janë realizuar pagesa në vlerë totale prej 5 milionë e 377 mijë e 58 euro.
Sipas aktakuzës, të pandehurit kanë vepruar në kundërshtim me Ligjin për Prokurim Publik dhe rregullat për shpenzimin e parasë publike.
Po ashtu, dyshohet se janë nënshkruar dhe certifikuar raporte të punimeve me sasi shumëfish më të larta se ato të parapara në dosjen e tenderit, pa aneks-kontratë, pa procedurë të re prokurimi dhe pa verifikim të rregullt nga komisioni për pranimin e punëve.
Prokuroria Speciale i ka propozuar Gjykatës që, krahas dënimit për veprën penale, të pandehurve t’u shqiptohet edhe ndalimi i ushtrimit të funksioneve në administratën publike ose në shërbimin publik.
