Thirrjet për pushkatimin e Ramush Haradinajt në Kuvendin e Kosovës kanë shkaktuar reagime të forta politike, ndërsa nga Aleanca është kërkuar ndërhyrje e menjëhershme e Prokurorisë së Shtetit.
Kryetari i Aleancës, Ardian Gjini, ka thënë se një gjuhë e tillë nuk është shfaqur rastësisht, por është rezultat i një klime politike të krijuar ndër vite përmes, siç e ka cilësuar ai, fushatave propaganduese.
Sipas Gjinit, deklarata kundër Haradinajt është tregues i një narrative që është ushqyer për një periudhë të gjatë dhe që tashmë ka prodhuar edhe thirrje të tilla brenda institucionit më të lartë ligjvënës të vendit.
Ai ka kritikuar ashpër ata që, sipas tij, kanë kontribuar në krijimin e kësaj klime, duke e cilësuar deklaratën kundër Haradinajt si “monstruoze”.
Gjini ka kërkuar që rasti të mos mbetet vetëm në nivelin e përplasjeve politike, por të trajtohet nga organet e drejtësisë.
“Prokuroria e Shtetit duhet të ndërhyjë urgjentisht”, ka deklaruar ai, duke theksuar se thirrjet e tilla nuk mund të normalizohen.
Kreu i Aleancës ka bërë gjithashtu dallim mes personit që ka bërë thirrjen dhe mërgatës shqiptare në përgjithësi, duke kundërshtuar çdo përpjekje për ta paraqitur këtë veprim si përfaqësues të komunitetit të gjerë të mërgatës.
Në fund, Gjini ka lëshuar edhe një mesazh të ashpër politik ndaj kundërshtarëve të Haradinajt, duke thënë se historia dhe populli janë në anën e tij.
Reagimi vjen pas thirrjeve të bëra në Kuvend, të cilat kanë nxitur debat të madh politik dhe kërkesa që rasti të hetohet nga institucionet kompetente.
