Shtëpia e futbollit evropian, UEFA, e ka dënuar me 35 mijë euro gjobë Federatën e Futbollit të Kosovës (FFK), për shkak të shkeljeve të tifozëve gjatë ndeshjes Austri – Kosovë.
Komisioni Disiplinor i UEFA-s ka shqiptuar dy gjoba ndaj FFK-së, njëra prej 15 mijë eurosh për “shfaqje mesazhi të papërshtatshëm për një ngjarje sportive”, ndërsa tjetra prej 20 mijë eurosh për “sjellje raciste dhe/ose diskriminuese”.
Përveç gjobës prej 20 mijë eurosh, FFK-së i është shqiptuar edhe masa e ndalimit të plotë të shitjes së biletave për tifozët e saj për një ndeshje si mysafire në garat e përfaqësueseve të UEFA-s.
Megjithatë, kjo masë është pezulluar për një periudhë prove prej dy vjetësh, duke filluar nga data e vendimit.
