Shkodra është ndarë me dhimbje nga Arben Anamali, kapiteni i anijes turistike që u bë hero kombëtar, pasi humbi jetën duke shpëtuar turistë izraelitë nga mbytja në Liqenin e Shkodrës.
Kapiteni 50-vjeçar, baba i dy fëmijëve, u hodh në ujë për t’u ardhur në ndihmë turistëve në rrezik, duke i shpëtuar me jelekët e shpëtimit. Pasi siguroi që ata ishin jashtë rrezikut, Arbeni nuk u kthye më në anije.
Trupi i tij u gjet pas tre ditësh kërkimesh intensive, në një ngjarje që ka prekur zemrat e të gjithë shqiptarëve.
Për veprën e tij të jashtëzakonshme, qeveria shqiptare e ka shpallur “Dëshmor i Atdheut”, duke e nderuar si simbol të humanizmit dhe sakrificës.
Të afërmit dhe bashkëqytetarët shprehen se shpresojnë që emri i Arben Anamalit të mbetet në kujtesën e çdo shqiptari, si një njeri që vuri jetën e të tjerëve mbi të vetën.
