Një konflikt mes dy të miturave ka përfunduar me sulm fizik në parkun e qytetit në Mitrovicën e Veriut, ndërsa shkak dyshohet të ketë qenë një përplasje për fjalë të thëna rreth të dashurit të njërës prej tyre.
Rasti ka ndodhur më 11 shtator, rreth orës 13:30, ndërsa pak minuta më vonë viktima, një 16-vjeçare, është paraqitur në Stacionin Policor në Mitrovicën e Veriut për ta raportuar rastin.
Sipas deklarimit të saj, ajo kishte shkuar në park pasi ishte ftuar aty nga një tjetër e mitur.
Kur ka mbërritur, e dyshuara 15-vjeçare e ka pyetur se përse po fliste keq për të dhe për të dashurin e saj, pas së cilës situata ka eskaluar.
Sipas raportimit, e mitura më pas dyshohet se ka filluar ta sulmojë fizikisht bashkëmoshataren.
Viktima nuk ka pranuar trajtim mjekësor, pasi ka deklaruar se nuk ndihej e lënduar.
Për rastin është njoftuar hetuesi kujdestar dhe Prokurori i Shtetit, i cili ka udhëzuar që rasti të iniciohet si “Sulm”.
E dyshuara është intervistuar në praninë e avokatit mbrojtës dhe nënës së saj, ndërsa pas përfundimit të procedurave është liruar në procedurë të rregullt.
Rasti mbetet nën hetim.
