Shtetet e Bashkuara të Amerikës kanë nisur një valë të re sulmesh ndaj objektivave në Iran, ka njoftuar Komanda Qendrore e SHBA-së (CENTCOM).
Sipas deklaratës së publikuar nga CENTCOM, operacioni ka nisur në orën 17:00 sipas kohës lindore amerikane dhe ka për qëllim goditjen e kapaciteteve iraniane që, sipas Uashingtonit, paraqesin kërcënim për anijet tregtare dhe sigurinë e marinarëve civilë në Ngushticën e Hormuzit.
Në njoftimin e bërë publik në platformën “X”, CENTCOM ka deklaruar se sulmet janë urdhëruar nga presidenti amerikan Donald Trump, duke theksuar se Irani do të mbahet përgjegjës për veprimet e tij.
Deri tani nuk janë bërë të ditura detaje për objektivat e goditura apo për dëmet e shkaktuara nga operacioni.
Autoritetet iraniane ende nuk kanë dhënë një reagim zyrtar lidhur me sulmet e fundit.
