Rrënimi i rregullave dhe institucioneve është dëmi më i madh që mund t’i shkaktohet një shteti, ka thënë deputeti i zgjedhur i LDK-së, Ermal Sadiku, duke reaguar ndaj zhvillimeve rreth konstituimit të Kuvendit.
Sadiku ka kritikuar Lëvizjen Vetëvendosje dhe deputetët e saj, duke pretenduar se pas përfundimit të afatit prej 48 orësh është shkelur edhe Rregullorja e Kuvendit të Kosovës.
“Nuk ka kurgjo që e dëmton shtetin më shumë sesa rrënimi i rregullave dhe institucioneve të tij. As korrupsioni, as nepotizmi, as tanket e as plumbat”, ka shkruar Sadiku.
Sipas tij, brenda një periudhe të shkurtër janë shkelur disa prej akteve dhe vendimeve më të rëndësishme institucionale.
“Për vetëm një muaj kanë mbërri me e shkel Kushtetutën, Aktgjykimin e Gjykatës dhe Rregulloren e Kuvendit”, ka deklaruar ai.
Sadiku ka ngritur edhe pyetjen se sa më shumë mund të dëmtohet një shtet nga cenimi i institucioneve të tij.
“Tash tregomani: cili armik i një shteti mundet me i bë këto më shpejt e më keq? Qysh mundet me u dëmtu një shtet më shumë se kaq?”, ka shkruar Sadiku.
Ai ka thënë se problemi nuk qëndron vetëm te mënyra e qeverisjes, por te dëmtimi i vetë themeleve institucionale.
“Kur e shkel Kushtetutën, e shpërfill Gjykatën dhe e shkel Rregulloren e institucionit më të lartë përfaqësues, nuk je veç tu e keqqeverisë shtetin. Je tu ia rrënu themelet. Këta më nuk janë amatera. Janë shkatërrues. Janë dëmtues të shtetit”, ka theksuar Sadiku.
