Shkruan Faton Ramadani
Dokumentet konfidenciale të hetimeve ndërkombëtare të UNMIK-ut për rastin e vrasjes së familjes Hajra tregojnë se teoria hetimore ishte e fokusuar në pista krejtësisht tjera dhe në persona të tjerë të përmendur në raportet zyrtare. Në asnjë pjesë të këtyre raporteve nuk përmenden vëllezërit Ramadani si të dyshuar, të përfshirë apo të lidhur me organizimin ose kryerjen e vrasjes.
Raportet ndërkombëtare përshkruajnë një linjë hetimi që lidhej me ngjarje të mëhershme, tentativa për atentat ndaj Hamez Hajrës dhe me persona që përmenden drejtpërdrejt në dokumentet e UNMIK-ut. Hetuesit ndërkombëtarë ngritën teori se vrasja mund të kishte lidhje me hetimet për tentim-vrasjen e vitit 1998 dhe me individë që ishin objekt i atyre hetimeve.
Prandaj, bazuar në dokumentet zyrtare ndërkombëtare të paraqitura, nuk rezulton asnjë provë apo referencë që implikon vëllezërit Ramadani në këtë rast. Me poshtë është përkthimi i raportiy dhe në foto raporti.
——–
KOMBET E BASHKUARA
Misioni i Administratës së Përkohshme të Kombeve të Bashkuara në Kosovë (UNMIK)
KONFIDENCIALE
Data: 19 tetor 2001
Për:
Vrasjet e familjes Hajra
Dosja R.M.S. #01-049
Nga:
Rod T. Hylton, CP#01106
R.M.S. Prishtinë
Subjekti:
Hetimi për tentim-vrasjen ndaj Hamez Hajrës
CCIU #2001-00080
1.
Më 8 maj 2001, gjatë një kontrolli në banesën e HALIL QADRAKUT në rajonin e Prizrenit (në lidhje me rastin e tyre #2000-JA-399), u sekuestruan dy letra.
Njëra nga letrat ishte një deklaratë e shkruar me dorë, pa datë, nga ushtarja e UÇK-së KIMETE KRASNIQI, në të cilën ajo kërkonte të mos caktohej në Zonën Operative të Drenicës, sepse më 19 prill 1998, si kusht për t’u bërë ushtare e UÇK-së, ajo kishte marrë pjesë në tentim-vrasjen e HAMEZ SHTUTICËS. Ajo përmend MUS JASHARIN, FEHMI LLADROVCIN, JAHIR DEDAKUN, SKENDER HALILIN dhe FADIL DEMAKUN si persona të përfshirë gjithashtu në tentativë.
Ajo më tej deklaron:
“…ai [HAMEZ SHTUTICA] është i lirë në qytetin e Gllogovcit dhe ne jemi të rrezikuar prej tij sepse ai e di që ne e kemi përgatitur aksionin kundër tij. Për këtë arsye unë nuk mund të veproj në Z.O.D.”
2.
Letra e dytë e sekuestruar ka titullin “Ushtria Çlirimtare e Kosovës, Zona Operative e Pashtrikut” dhe mban datën 19 gusht 1999.
Kjo letër titullohet “NJOFTIM ZYRTAR” dhe është nga HALIL QADRAKU në cilësinë e Shefit të ZKZ-së. Letra duket se mbështet kërkesën e KRASNIQIT që të mos dërgohet në Zonën Operative të Drenicës.
Jam informuar se ZKZ është një njësi sekrete brenda UÇK-së.
3.
Bazuar në dy letrat e sekuestruara, më 22 maj 2001, oficeri Tobin, CP#05371, i Njësisë Rajonale të Hetimeve në Prizren, hapi një hetim për tentim-vrasje, #2001-JI-30.
Për shkak të bindjes se incidenti kishte ndodhur në rajonin e Mitrovicës, Shefi Rajonal Dan Saavedra e përcolli rastin tek Njësia Rajonale e Hetimeve në Mitrovicë. Mitrovica hapi hetim me numrin #2001-BI-219.
4.
Më 6 qershor 2001, rasti iu caktua Ekipit 1 të Njësisë Rajonale të Hetimeve për hetim.
5.
Më 11 korrik 2001, hetuesit e Njësisë Rajonale të Hetimeve në Mitrovicë, Herve Luthun, CP 05834, dhe Yves Auger, CP 06313, kontaktuan komandantin e stacionit të Gllogovcit, Dan Jones, dhe e informuan për hetimin.
Komandanti Jones deklaroi se do të përpiqej të siguronte informacione për HAMEZ SHTUTICËN nga Njësia e Inteligjencës dhe Njësia e Hetimeve.
6.
Më 13 korrik 2001, komandanti i stacionit Dan Jones nga Gllogovci informoi hetuesit Luthun dhe Auger se, pasi kishte kontrolluar me zyrtarët e tij, kishte mësuar se HAMEZ SHTUTICA në fakt ishte HAMEZ HAJRA dhe se ai jetonte në një vendndodhje të panjohur në Gllogovc.
(Oficeri i SHPK-së MUHARREM XHEMAJLI, zyrtari i inteligjencës për Stacionin Policor të Gllogovcit, e dinte saktësisht se ku jetonte Hamez Hajra, sepse e kishte intervistuar atë në banesën e tij në pranverën e vitit 2000, në kohën kur XHEMAJLI ishte anëtar i policisë sekrete të TMK-së.)
7.
Më 17 gusht 2001, hetuesi Luthun shkroi një raport hetimor ku përshkruante hetimet e tij, përfshirë kontaktet me Policinë e Gllogovcit lidhur me këtë rast.
Ai përmend përpjekjet e tij për të lokalizuar të dyshuarën KIMETE KRASNIQI.
8.
Më 20 gusht 2001, HAMEZ HAJRA dhe familja e tij u vranë.
9.
Gjatë gjithë hetimit të mëvonshëm për vrasjen e familjes Hajra, ASKUSH nga Stacioni Policor i Gllogovcit nuk e ka informuar këtë hetues për hetimin e Mitrovicës ndaj KIMETE KRASNIQIT për tentim-vrasjen e Hamezit në vitin 1998, pavarësisht faktit se Njësia e Inteligjencës dhe Njësia e Hetimeve kishin qenë të përfshira në atë hetim pesë javë para vrasjeve.
PSE?
TEORIA:
Hamez Hajra dhe familja e tij u vranë më 20 gusht 2001 sepse më 13 korrik 2001 TMK-ja u bë e vetëdijshme se po zhvillohej një hetim penal lidhur me tentim-vrasjen e Hamez Hajrës në vitin 1998 dhe se të paktën gjashtë anëtarë të TMK-së mund të përballeshin me ndjekje penale.
