Një gjykatë në Kajro ka dënuar me vdekje përmes varjes prezantuesen televizive egjiptiane Sarah Khalifa dhe 11 persona të tjerë, pasi i shpalli fajtorë për prodhim dhe trafikim të lëndëve narkotike.
Sipas gazetës shtetërore egjiptiane Al-Ahram, të dënuarit akuzoheshin për krijimin e një grupi të organizuar kriminal, i cili siguronte lëndë për prodhimin e drogës me qëllim shitjen e saj.
Gjatë operacionit, autoritetet sekuestruan mbi 750 kilogramë drogë dhe materiale për prodhimin e saj. Dy banesa dyshohet se përdoreshin si laboratorë, ndërsa u gjetën edhe armë zjarri dhe municion pa leje, raporton BBC.
Khalifa, 39 vjeçe, njihet për drejtimin e emisionit televiziv “Mission Impossible”, i cili trajtonte çështje të sigurisë dhe kriminalitetit. Ajo i ka mohuar akuzat.
Në të njëjtin rast, nëntë të pandehur u dënuan me burgim të përjetshëm, ndërsa shtatë të tjerë u shpallën të pafajshëm dhe u liruan nga akuzat. Në total, procesi përfshinte 28 persona.
Vendimi u konfirmua pasi gjykata mori opinionin e Myftiut të Madh të Egjiptit, procedurë e detyrueshme ligjore para shqiptimit përfundimtar të një dënimi me vdekje. Ky opinion është këshillues dhe vendimi mund të apelohet.
