Dita e dasmës duhet të jetë ndër më të lumturat në jetën e një çifti. Për shumicën, martesa është një hap i madh dhe një festë ku familjarët e miqtë bashkohen për të parë çiftin duke nisur jetën e re së bashku.
Zakonisht, çiftet martohen pasi janë të bindur se partneri është personi me të cilin duan të kalojnë jetën. Edhe pse divorcet ndodhin, zakonisht ka të paktën një periudhë lumturie martesore. Por për një grua anonime, martesa mori fund pothuajse menjëherë, pasi ajo kërkoi divorc vetëm një ditë pas dasmës.
Gruaja i shkroi rubrikës së njohur të këshillave “Dear Prudence” në Slate, duke treguar se ishte e emocionuar për martesën, por gjithçka ndryshoi kur bashkëshorti i saj theu të vetmin “rregull të panegociueshëm” që ajo kishte vendosur për ceremoninë.
Ajo i kishte kërkuar qartë që të mos merrte pjesë në trendin e njohur ku nusja dhe dhëndri lyejnë fytyrat e njëri-tjetrit me tortë gjatë dasmës. Nusja besonte se partneri do ta respektonte dëshirën e saj, por ndodhi krejt e kundërta.
Në vend të kësaj, veprimi i tij në pritje e la atë të tmerruar dhe të poshtëruar, aq sa kuptoi se nuk mund ta vazhdonte më marrëdhënien.
“Nuk kam qenë kurrë shumë e dhënë pas martesës, por as nuk isha kundër saj. Kur i dashuri më propozoi në vitin 2020, vendosëm ta bënim dasmën. Secili morëm përsipër gjysmën e organizimit dhe mendoj se kam qenë mjaft kompromisuese. I vetmi rregull absolut ishte që ai të mos më lyente fytyrën me tortë”, shkroi ajo.
“Duke qenë një njeri i arsyeshëm që më njeh mirë, ai nuk e bëri këtë. Në vend të saj, më kapi nga pjesa e pasme e kokës dhe ma futi fytyrën në tortë. Gjithçka ishte planifikuar, sepse torta u shkatërrua dhe ai kishte përgatitur cupcakes si zëvendësim.”
Pas incidentit, nusja tha se i deklaroi menjëherë bashkëshortit se gjithçka kishte marrë fund dhe u largua nga dasma e saj. Megjithatë, ceremonia ishte afër festave të fundvitit dhe familjarët e bindën të priste deri pas pushimeve për të nisur procedurat e divorcit ose anulimit të martesës.
“Ata më thonë se po reagoj tepër për shkak të problemeve të mia, sepse jam shumë klaustrofobike pas një aksidenti me makinë vite më parë dhe panikosa plotësisht kur më shtyu në tortë dhe më mbajti aty”, tregoi ajo.
Familjarët vazhduan t’i thoshin se ajo ende e dashuron burrin e saj dhe se ai e dashuron atë, ndaj nuk duhej të hiqte dorë “në pengesën e parë”. Por nusja tha se nuk ndiente më asgjë për të dhe nisi të dyshonte nëse po bënte gabim, për shkak të presionit të madh nga të afërmit.
Në përgjigjen e saj, këshilltarja e rubrikës i sugjeroi gruas të vazhdonte me divorcin, duke e konsideruar sjelljen e dhëndrit një “flamur të madh të kuq”.
Historia u shpërnda më vonë edhe në Reddit, ku përdoruesit mbetën të shokuar nga sjellja e dhëndrit dhe shprehën mbështetje për vendimin e gruas.
“Nuk ishte thjesht një lojë e lehtë me tortë në fytyrë; ai ia përplasi kokën dhe e poshtëroi”, shkroi një komentues.
Ndërsa një tjetër shtoi: “Ai jo vetëm që nuk respektoi kufirin e saj të vetëm, por gjeti mënyrën më agresive dhe më poshtëruese për ta shkelur atë.”
