Bota akademike dhe mjekësore në Kosovë është zotuar me lajmin për ndarjen nga jeta të Prof. Dr. Zylfi Azizi, një prej figurave më të respektuara në fushën e gjinekologjisë dhe arsimit mjekësor në vend.
Prof. Dr. Azizi kreu studimet për Mjekësi të Përgjithshme në Universitetin e Beogradit në vitin 1968, ku gjithashtu përfundoi edhe studimet pasdiplomike. Specializimin për Obstetrikë-Gjinekologji dhe citodiagnostikë e realizoi në Fakultetin e Mjekësisë të Universitetit të Prishtinës, ku në vitin 1984 mbrojti edhe temën e doktoratës.
Gjatë karrierës së tij, Prof. Dr. Azizi punoi fillimisht si mësues në Kumanovë, për të vazhduar më pas si mjek në Klinikën e Gjinekologjisë në Prishtinë. Në vitin 1978 u emërua asistent, më pas profesor inordinar dhe përfundimisht profesor ordinar në lëndën e Gjinekologjisë në Fakultetin e Mjekësisë.
Në vitin 1990, ai u përjashtua padrejtësisht nga puna nga autoritetet e dhunshme serbe. Megjithatë, ai nuk ndaloi aktivitetin e tij profesional dhe arsimor – duke vazhduar punën në një poliklinikë private në Prishtinë, ku gjithashtu organizoi mësim praktik për studentët e Fakultetit të Mjekësisë, duke shndërruar ordinancën e tij në një hapësirë të vërtetë mësimore.
Oda e Mjekëve të Kosovës i ka shprehur ngushëllimet më të sinqerta familjes, miqve dhe kolegëve të tij, duke vlerësuar lart kontributin e tij të jashtëzakonshëm në shërbim të shëndetësisë dhe arsimit në vend.
