Marrëveshja mes Lëvizjes Vetëvendosje dhe Lidhjes Demokratike të Kosovës për kandidaturën e Bekim Sejdiut për president të Kosovës ishte zhvillimi kryesor politik i ditës së djeshme. Marrëveshja u bë publike nga kryetari i LDK-së, Lumir Abdixhiku, pas takimit me kryetarin e LVV-së, Albin Kurti, ndërsa vetë Sejdiu konfirmoi se e ka pranuar kandidaturën.
Abdixhiku e cilësoi dakordimin si një hap në interes të shtetit, duke theksuar se interesi i Kosovës duhet të jetë mbi atë partiak. Nga ana tjetër, Kurti e përshëndeti marrëveshjen si një mundësi për tejkalimin e ngërçit institucional.
Por, marrëveshja nuk kaloi pa kundërshtime, veçanërisht brenda vetë LDK-së. Deputeti Avdullah Hoti deklaroi qartë se nuk do ta votojë Sejdiun, duke argumentuar se ai nuk është figura unifikuese që, sipas tij, i duhet vendit.
Edhe deputetë të tjerë të LDK-së shprehën rezerva. Gjatë ditës u bë e ditur se gjashtë deputetë të kësaj partie kanë deklaruar se nuk do ta mbështesin Sejdiun, çka e komplikon marrëveshjen politike të arritur mes dy liderëve. Abdixhiku paralajmëroi se për këto qëndrime mund të ketë edhe masa brenda partisë.
Në krahun tjetër, pati edhe mbështetje të fortë për kandidaturën. Ish-presidentja Vjosa Osmani e përkrahu Sejdiun dhe tha se shpreson që LDK-ja t’i ketë të 18 votat për zgjedhjen e tij. Ndërsa deputeti Anton Quni deklaroi se e mbështet kandidaturën, duke e vlerësuar Sejdiun si figurë që mund ta bëjë kombin krenar.
Anëtari i Kryesisë së LDK-së, Shkëmb Manaj, shkoi edhe më tej duke shprehur bindjen se të gjithë deputetët e LDK-së do të marrin pjesë në votim, madje tha se beson se edhe Hoti në fund do ta mbështesë Sejdiun.
Nga opozita, kryetari i PDK-së, Bedri Hamza, ishte i prerë: PDK-ja nuk do ta votojë Bekim Sejdiun. Ai tha se një president duhet të jetë figurë unifikuese, por sipas tij, “fillimet” e kësaj kandidature nuk janë të mira. Një ditë më herët Hamza kishte ngritur edhe dilemat nëse LVV-ja dhe LDK-ja do t’i kenë numrat e nevojshëm.
Kandidatura mori ndërkohë edhe mbështetje nga figura jashtë skenës së drejtpërdrejtë politike. Një grup prej 28 veprimtarësh dhe intelektualësh shqiptaro-amerikanë u bëri thirrje deputetëve që ta votojnë Sejdiun, ndërsa Harry Bajraktari e cilësoi marrëveshjen LVV–LDK si lajm të mirë për tejkalimin e ngërçit politik.
Në fund të ditës, vëmendja u zhvendos te numrat në Kuvend. LVV dhe LDK së bashku kanë 71 deputetë, ndërsa për zgjedhjen e presidentit nevojitet shumicë prej dy të tretash në dy rundet e para, pra 80 vota. Për këtë arsye, përveç marrëveshjes mes Kurtit dhe Abdixhikut, vendimtare mbetet edhe sjellja e deputetëve që nuk janë pjesë e këtij dakordimi.
