Kryetari i Skenderajt, Sami Lushtaku, i është përgjigjur kryetarit të Lidhjes Demokratike të Kosovës, Lumir Abdixhiku, pas deklaratave të këtij të fundit në një paraqitje televizive.
Lushtaku i ka porositur kreut të LDK-së që të mos ia përmendë emrin, por të merret me zgjidhjen e problemeve brenda partisë së tij.
Më tej, i pari i Skenderajt është shprehur se sa herë që të tjerët dëshirojnë të “shesin pallavra”, gjejnë si mundësi përplasjen me emrin e tij.
‘’Me asnjë deputet të tij nuk kam nejt najherë, po s’kam nejt edhe me kryetarin e LDK’së. Kështu kur dojn me shit pallavra e gjejnë një mundësi edhe ma përdorin emrin tim. Kështu e kisha lut që mos përdor emrin tim, s’ka nevojë, s’ka asnjë arsye. Unë mendoj që ai është kryetar i LDK’së, ai le të merret me LDK’në, jo me mu. Është e padrejtë se unë asnjëherë as nuk jam marr as nuk kam fol, unë kam shokë në të gjitha partitë politike, në këtë rast edhe në LDK, po me njerëz që janë përgjegjës apo janë në kryesi, apo deputet, asnjëherë nuk jam taku. Po del interesant kur ma përdor emrin, goxha del interesant. Unë mënoj që duhet me i zgjidh problemet brenda shtëpisë të vetë, ai s’ka nevojë me u marr me mu’’, ka thënë Lushtaku.
