Shkruan: Ismet Haziri
Nuk munda të qëndroja pa shkruar.
Jakup Krasniqi tere jetën e vet ia kushtoi një copëze lirie. Një lirie që Evropa na e mohoi padrejtësisht në konferenca e kongrese, duke na copëtuar gjatë periudhave të ndryshme të historisë.
E sot, po ai burrë, plak i lirisë, persekutohet në kazamatet evropiane. Denigrohet edhe në momentet e dhimbjes, kur bashkëshortja e tij po bën betejën për shëndetin.
Por ajo që ndodhi me vëllain e tij, nuk durohet.
Vëllai i moshuar i Jakupit, një plak me thinja, me duar që dridhen nga mosha e nga dhimbja, po përpiqet veç me ia prek dorën vëllait të vet. Veç me ia prek dorën. Asgjë më shumë.
Dhe forcat policore evropiane nuk e lejojnë. Ia largojnë dorën. Ia ndalojnë prekjen.
Mjaft më. Kjo është poshtërim. Kjo është jonjerëzillëk i pastër.
Çfarë rreziku paska në një prekje dore? Çfarë kërcënimi paska në dorën e një plaku shqiptar? A kaq shumë ju ka hyrë frika në palcë, sa keni frikë edhe nga dashuria vëllazërore?
Kjo nuk është në traditën shqiptare.
Te ne, vëllai është gjak. Vëllai është nder. Vëllai është ai që të rri pranë në ditë zie e në ditë gëzimi. Te ne, dorën e vëllait të moshuar nuk e largon askush. Te ne, plakut nuk i thuhet “mos e prek”. Te ne, kur dy vëllezër takohen pas dhimbjes e pas ndarjes, ata përqafohen — nuk i ndajnë policët me duar të huaja.
E kjo Gjykatë, që e ka bazën në Kushtetutën e Kosovës, në Kushtetutën tonë, si guxon me e leju këtë poshtërim?
Kushtetutën tonë nuk e ka shkruar Evropa. E ka shkruar gjaku i këtij populli. E ka shkruar edhe Jakup Krasniqi. Si mundet një gjykatë që buron nga Kushtetuta e Kosovës, me e trajtuar Jakupin si të huaj në tokën e vet, e vëllain e tij si kërcënim?
Ne nuk kërkojmë mëshirë. Kërkojmë njerëzillëk. Kërkojmë dinjitet.
Lëreni një vëlla të moshuar me ia prek dorën vëllait të vet. Lëreni dhimbjen me qenë dhimbje, e jo procedurë. Lëreni dinjitetin me qenë dinjitet, e jo leje me orë.
Sepse nëse një prekje dore ju tremb, atëherë problemi nuk është te Jakupi. Problemi është te ju.
Me dhimbje e me nder,
Një shqiptar që nuk hesht









