Kryeministri në detyrë, Albin Kurti, ka pritur në takim ambasadoren e re të Suedisë në Kosovë, Åsa Pehrson.
Kurti bëri të ditur se me Pehrson ishte takuar për herë të parë dy dekada më parë në “Balkan Desk” në Stokholm, ndërsa sot u ritakuan në ndërtesën e Qeverisë.
Ai e falënderoi ambasadoren për mbështetjen dhe kontributin që Suedia i ka dhënë Kosovës dhe popullit të saj para dhe pas çlirimit e pavarësisë.
Sipas Kurtit, Suedia është ndër pesë donatorët më të mëdhenj të Kosovës, ndërsa rreth nëntë mijë ushtarë suedezë kanë shërbyer në kuadër të KFOR-it që nga përfundimi i luftës.
Ai kujtoi se Suedia u bë strehë edhe për shumë familje shqiptare nga Kosova, përfshirë minatorë të Trepçës që u detyruan të largoheshin pas grevës së vitit 1989.
Kurti tha se e ka njoftuar ambasadoren Pehrson për zhvillimet në ekonomi, përparimin në fushën e drejtësisë dhe zhvillimet aktuale politike në vend.
“Po ashtu kërkova vazhdimin e mbështetjes së Suedisë në rrugën tonë drejt anëtarësimit në institucionet euroatlantike”, deklaroi Kurti.
