Ministria e Tregtisë e Kinës ka reaguar ashpër ndaj marrëveshjeve tregtare që mund të lidhen mes vendeve të treta dhe Shteteve të Bashkuara në dëm të interesave kineze.
Në një deklaratë zyrtare, autoritetet kineze paralajmëruan se “Kina nuk do ta pranojë një situatë të tillë dhe do të ndërmarrë kundërmasa vendimtare për të mbrojtur të drejtat dhe interesat e saj legjitime.”
Kjo deklaratë vjen në përgjigje të raportimeve për negociata të fundit tregtare të SHBA-së me vende të tjera, teksa Washingtoni pritet të rrisë tarifat ndaj partnerëve tregtarë në fillim të korrikut, nëse nuk arrihen marrëveshje të reja.
“Ky është një akt tipik i ngacmimit të njëanshëm që dëmton seriozisht sistemin tregtar shumëpalësh dhe prish rendin normal të tregtisë ndërkombëtare,” thuhet në deklaratë, duke nënvizuar se vetëm qëndrimi i fortë dhe parimor mund të mbrojë të drejtat legjitime të vendeve sovrane.
Ministria konfirmoi se Kina do të mbrojë me vendosmëri interesat e saj në çdo negociatë që mund të përfshijë ndërhyrje të padrejta në tregtinë ndërkombëtare.
