Forcat e Mbrojtjes së Izraelit (IDF) kanë nisur të hënën në mëngjes një valë të re sulmesh ajrore ndaj infrastrukturës ushtarake iraniane në qytetin Kermanshah, në Iranin perëndimor.
Në një deklaratë të publikuar në platformën X, ushtria izraelite konfirmoi se avionët luftarakë të saj janë duke goditur aktualisht objektiva ushtarake në këtë provincë strategjike iraniane.
Paraprakisht, mediat iraniane, përfshirë Nour News e lidhur me shtetin, raportuan se Izraeli kishte goditur edhe kompleksin ushtarak Parchin, i ndodhur në juglindje të Teheranit, në një sulm të ndodhur gjatë orëve të para të mëngjesit.
Ndërkohë, Irani ka reaguar duke lëshuar një raketë drejt Izraelit, e cila u kap nga sistemi izraelit i mbrojtjes ajrore.
