Gjatë procesit të rinumërimit të votave në Qendrën e Numërimit dhe Rezultateve (QNR), janë ngritur dyshime për parregullsi në disa vendvotime në komunat me shumicë serbe.
Në disa fletëvotime janë vërejtur shënime të ngjashme dhe modele të njëjta të plotësimit, gjë që ka nxitur dyshime për manipulim të mundshëm të procesit zgjedhor.
Po ashtu, gjatë verifikimit të listave të votuesve janë evidentuar raste të nënshkrimeve të ngjashme, të cilat pritet të analizohen nga institucionet kompetente për të përcaktuar nëse bëhet fjalë për parregullsi.
“KQZ, ka filluar ri numërimi i kutive të votimit për vendvotimet e përzgjedhura sipas rastësisë. Nga ri numërimi i kutisë së votimit për vendvotimin 3602/02 në Komunën e Parteshit, kemi hasur në fletëvotime (të bashkangjitura në e-mail) për të cilat shihet paterni i njëjtë (shënjimi në fletëvotim) në tri (3) raste të ndryshme. Po ashtu, për këtë vendvotim, gjeni edhe imazhe të listës përfundimtare të votuesve, ku vërehen nënshkrime të njëjta, e për të cilat duhet të vërtetohen nga institucione/ organe kompetente. Raste të tilla sikurse në Komunën e Parteshit, ka edhe në komunat tjera, si: Graçanicë në dy vendvotime: 3401/01 dhe 3403/01. Po ashtuë në Zveçan në vendvotimin: 2905/01”, thuhet në denoncim.
Sipas denoncimit, raste të tilla janë identifikuar në vendvotime në Partesh, Graçanicë dhe Zveçan. Çështja tashmë është raportuar në Policinë e Kosovës, ndërsa pritet që organet përgjegjëse të zhvillojnë hetimet dhe verifikimet e nevojshme.
