Një 28-vjeçar në Hawaii është shpallur fajtor për vrasjen e partneres së tij dhe djalit të tyre 6-muajsh, në një rast që prokuroria e cilësoi si një akt jashtëzakonisht brutal të dhunës në familje.
Kendall Ramsey, ish-ushtar i ushtrisë amerikane nga Çikago, u shpall fajtor nga një juri në Oahu për vrasjen e shkallës së parë të Kayla Holder, 23-vjeçare, dhe foshnjës së tyre Kainoa Ramsey.
Sipas prokurorëve, Ramsey i sulmoi me thikë të dy viktimat më shumë se 50 herë. Pas krimit, ai shkroi në murin e apartamentit mesazhin “Më fal” me gjakun e viktimave.
Hetuesit përshkruan një skenë tronditëse në banesë, ku u gjetën trupat e Holder dhe foshnjës së saj. Prokuroria tha se gruaja kishte 38 plagë nga thika, ndërsa foshnja 17.
Mbrojtja pretendoi se Ramsey kishte qenë në një krizë të rëndë psikologjike, duke përmendur depresion, mendime vetëvrasëse dhe trauma të mëparshme.
Ai pritet të marrë dënimin në nëntor, ndërsa mund të përballet me burgim të përjetshëm pa mundësi lirimi me kusht.
