Një 27-vjeçar dhe foshnja e tij janë gjetur pa shenja jete mëngjesin e sotëm në një shtëpi në fshatin Demiraj të Gjilanit.
Lajmin e ka konfirmuar zëdhënësi i Policisë për rajonin e Gjilanit, Ismet Hashani, i cili bëri të ditur se Policia ka pranuar informacionin për rastin rreth orës 08:47.
“Më 01.11.2026 rreth orës 08:47 kemi pranuar informacion se në një shtëpi në fshatin Demiraj të komunës së Gjilanit, dyshohet për dy trupa të pajetë, një person i gjinisë mashkullore i vitit të lindjes 1999 dhe një foshnjë. Me urgjencë në vendin e ngjarjes kanë dalë njësitet përkatëse policore, Prokurori i Shtetit dhe ekipi emergjent mjekësor, ku nga mjeku kujdestar është konstatuar se të dy personat janë pa shenja jete”, ka thënë Hashani.
Sipas Policisë, viktimat janë babai 27-vjeçar dhe foshnja e tij, të cilët janë gjetur të vdekur brenda shtëpisë së tyre në Demiraj.
Me vendim të Prokurorit të Shtetit, trupat e pajetë do të dërgohen në Institutin e Mjekësisë Ligjore në Prishtinë për obduksion.
Ndërkohë, Policia dhe Prokuroria janë duke zhvilluar hetimet për të zbardhur rrethanat e këtij rasti, i cili është cilësuar si “Vdekje e dyshimtë”.
