Kryetari i Komunës së Prishtinës, Përparim Rama, ka thënë se Gjykata Supreme ka refuzuar propozimin e grupit të asambleistëve të Lëvizjes Vetëvendosje për pezullimin e ekzekutimit të vendimit të Komunës lidhur me ndryshimin e çmimit të biletës së transportit publik.
Rama ka thënë se vendimi i gjykatës dëshmon se kërkesa e asambleistëve nuk ka pasur bazë, ndërsa i ka quajtur ata “dashakëqij”.
“Gjykata Supreme e ka refuzuar kërkesën e grupit të asambleistëve të Lëvizjes Vetëvendosje! Po e ripërsëris, përveç që jeni dashakëqij, jeni edhe të padijshëm!”, ka shkruar Rama.
Në aktvendimin e datës 28 korrik 2026, Gjykata Supreme ka refuzuar propozimin për pezullimin dhe ndalimin e prodhimit të efekteve juridike të vendimit të Komunës së Prishtinës, të nxjerrë më 29 qershor, deri në vendimin përfundimtar të gjykatës.
Sipas gjykatës, pretendimet e palës propozuese nuk përmbajnë argumente ligjore të mjaftueshme për shqyrtimin e masës së sigurisë.
