Të paktën katër persona kanë humbur jetën dhe 27 të tjerë janë plagosur si pasojë e një sulmi ajror rus në qytetin Dobropillia, në lindje të Ukrainës, njoftuan zyrtarët lokalë të enjten.
Sipas autoriteteve, sulmi u krye me një bombë ajrore të tipit FAB 500, e cila goditi një qendër tregtare. Kreu i administratës ushtarake rajonale të Donetskut konfirmoi se 54 dyqane me pakicë, 304 apartamente dhe 8 automjete janë dëmtuar rëndë, ndërsa pas shpërthimit ka shpërthyer edhe një zjarr i madh.
Presidenti ukrainas Volodymyr Zelensky reagoi ashpër pas sulmit, duke e cilësuar aktin si një akt të pastër terrori ndaj civilëve.
“Ky është terror i tmerrshëm dhe i trashë rus. Thjesht një përpjekje për të vrarë sa më shumë të jetë e mundur. Rusia është e përqendruar te sulmet e liga si kjo”, tha ai.
“Thjesht i tmerrshëm. Nuk ka asnjë logjikë ushtarake në këtë”.
Dobropillia ndodhet rreth 15 kilometra nga vija e frontit, në pjesën perëndimore të rajonit të Donetskut. Forcat ruse thuhet se po tentojnë të avancojnë drejt qytetit nga juglindja.
Bombat FAB, të cilat janë me peshë të madhe dhe lëshohen nga avionë luftarakë, janë bërë një kërcënim serioz për infrastrukturën dhe qytetet afër vijës së frontit. Ato përdoren për të goditur objektiva statikë si pozicionet ushtarake, ura dhe objekte industriale.
Sipas Misionit të Monitorimit të të Drejtave të Njeriut të OKB-së në Ukrainë, vetëm në vitin 2024, bombat ruse kanë vrarë 360 civilë dhe plagosur 1,861 të tjerë – një rritje trefish e viktimave dhe një rritje gjashtëfish e të plagosurve krahasuar me vitin 2023.
