Presidentja e Kosovës, Vjosa Osmani, gjatë vizitës zyrtare në Shtetet e Bashkuara të Amerikës, ka zhvilluar një takim të rëndësishëm me ambasadoren e SHBA-ve në Organizatën e Kombeve të Bashkuara, Dorothy Shea.
Lajmi është bërë i ditur nga vetë Misioni i SHBA-ve në OKB përmes një postimi në platformën “X”, ku është theksuar përkushtimi i palëkundur i SHBA-ve ndaj Kosovës dhe mbështetja për anëtarësimin e saj të plotë në OKB.
Gjatë takimit, ambasadorja Shea ka përcjellë një mesazh të qartë, duke theksuar se roli i UNMIK-ut në Kosovë tashmë ka përfunduar.
“Ishte nder të takohem me Presidenten e Kosovës, Vjosa Osmani. Shtetet e Bashkuara e konsiderojnë Kosovën një partnere të ngushtë strategjike dhe janë fuqimisht të përkushtuara ndaj njohjes së saj së plotë në Organizatën e Kombeve të Bashkuara. Koha për të mbyllur UNMIK-un, misionin e OKB-së është tani”, thuhet në njoftim.
