Michael Madsen, aktori i njohur për rolet në filmat e famshëm “Reservoir Dogs” dhe “Kill Bill”, ka ndërruar jetë në moshën 67 vjeçare në shtëpinë e tij në Malibu. Autoritetet dhe përfaqësuesit konfirmuan se ai u gjet pa ndjenja dhe se vdekja nuk lidhet me ndonjë element dhune.
Menaxheri i tij, Ron Smith, njoftoi se shkaku i vdekjes ishte një sulm në zemër. Madsen u shpall i vdekur mëngjesin e ditës së sotme në orën 8:25.
Në një deklaratë të përbashkët, menaxheri, menaxherja dhe publicistja e tij vlerësuan punën e jashtëzakonshme të Madsen gjatë dy viteve të fundit në filma të pavarur dhe projektet e tij të ardhshme, përfshirë librin e tij të ri “Tears for My Father: Outlaw Thoughts and Poems”, që ishte në proces redaktimi.
Michael Madsen la pas një karrierë të gjatë mbi katër dekada, duke qenë një nga figurat më të njohura dhe ikonike të Hollivudit. Ai do të mungojë shumë në botën e filmit dhe te fansat e tij.
