Koreja e Veriut ka dënuar ashpër sulmet ajrore të SHBA-së ndaj objekteve bërthamore iraniane, duke i cilësuar ato si një shkelje të rëndë të sovranitetit dhe sigurisë së një shteti, njoftoi të hënën agjencia shtetërore KCNA.
Në një deklaratë të Ministrisë së Jashtme të Koresë së Veriut, thuhet se “Shtetet e Bashkuara dhe Izraeli janë përgjegjësit kryesorë për krizën aktuale në Lindjen e Mesme, përmes lëvizjeve të tyre agresive dhe ndërhyrjeve territoriale që mbështeten nga Perëndimi.”
Pheniani theksoi se mbështet Iranin në të drejtën për vetëmbrojtje dhe paralajmëroi se sulme të tilla do të kenë pasoja të gjera për sigurinë ndërkombëtare.
Irani dhe Koreja e Veriut kanë ruajtur lidhje të ngushta për dekada dhe janë të dyshuar për bashkëpunim në zhvillimin e raketave balistike. Ekspertë ndërkombëtarë kanë paralajmëruar se Pheniani mund të ndihmojë Teheranin në rindërtimin e infrastrukturës së dëmtuar, përfshirë ndoshta edhe në zona të fshehta për t’i shmangur monitorimet.
Ndërkohë, Koreja e Veriut ka forcuar gjithashtu lidhjet me Rusinë, duke i ofruar armë dhe trupa për luftën në Ukrainë, sipas burimeve të inteligjencës perëndimore.
