Frymëmarrja, ndonëse një proces automatik dhe i pavetëdijshëm, mund të ketë ndikim të madh në shëndetin tonë, veçanërisht në zemër. Sipas kardiologëve, mënyra se si marrim frymë mund të ndihmojë në menaxhimin e stresit dhe të ulë ndjeshëm rrezikun për sëmundje kardiovaskulare.
Në momente stresi, trupi reagon me rritje të rrahjeve të zemrës, tension të lartë të gjakut dhe tendosje muskulore – faktorë që e rëndojnë ndjeshëm zemrën. Kardiologu Dr. Mohamed Shirazi, në një prononcim për Parade, thekson se “nëse jeni vazhdimisht nën stres, ndodhin procese inflamatore në trup dhe rriten nivelet e sheqerit dhe kolesterolit, duke shtuar rrezikun për sëmundje të zemrës”.
Një nga teknikat më të thjeshta, por tejet efektive për të përballuar stresin, është “frymëmarrja në kuti”, një teknikë e strukturuar frymëmarrjeje e cila ndihmon në rikthimin e ritmit normal të trupit.
Kjo metodë konsiston në katër hapa të barabartë: thithje për katër sekonda, mbajtje të frymës për katër sekonda, nxjerrje të frymës për katër sekonda dhe pushim për katër sekonda – cikël që mund të përsëritet për tre minuta.
Kardiologia Dr. Luiza Spadaro vë në dukje se kjo teknikë përdoret shpesh pas episodeve stresuese për të qetësuar trupin dhe mendjen. “Praktikimi i rregullt i frymëmarrjes në kuti mund të përmirësojë gjumin, të ulë ndjeshëm stresin dhe të ketë ndikim pozitiv në shëndetin e zemrës”, shton ajo.
Ekspertët theksojnë se përfitimet nuk janë vetëm emocionale: frymëmarrja e kontrolluar ndihmon në uljen e tensionit të brendshëm dhe në përmirësimin e funksioneve të zemrës dhe mushkërive – duke e bërë këtë teknikë një mjet të vlefshëm për mirëqenien fizike dhe mendore.
