YouTube ka nisur testimin e një funksioni të ri që synon të shpërblejë shikuesit më të angazhuar gjatë transmetimeve të drejtpërdrejta, duke krijuar një renditje të posaçme për ta.
Renditja do të përfshijë 50 shikuesit më aktivë në një kanal, të cilët fitojnë pikë përmes pjesëmarrjes në biseda, dërgimit të “super chat”-eve dhe aktiviteteve të tjera gjatë transmetimit. Tre përdoruesit kryesorë do të shfaqen me një logo të veçantë pranë emrit të tyre, për t’i dalluar nga pjesëmarrësit e tjerë.
Ky funksion do të jetë i dukshëm në krye të bisedës së drejtpërdrejtë përmes një ikone të vogël kurorë. Megjithatë, nuk është sqaruar ende se si YouTube i llogarit pikët “prapa skenave”.
YouTube nuk ka konfirmuar nëse veçoria është aktive si parazgjedhje, por ka bërë të ditur se përdoruesit mund ta çaktivizojnë në çdo kohë përmes cilësimeve, si në celular ashtu edhe në desktop.
