Një tjetër shpërthim ka tronditur fabrikën ushtarake serbe “Krushik” në Valevë, ku rreth orës 07:30 të mëngjesit të sotëm ndodhi një incident në repartin e kapsollave.
Shtatë persona kanë pësuar lëndime të lehta dhe po trajtohen në Spitalin e Valevës, sipas informacioneve jo zyrtare nga spitali ku po trajtohen.
Shkaqet e shpërthimit ende nuk janë bërë të ditura, ndërsa autoritetet serbe nuk kanë dalë me ndonjë deklaratë zyrtare për rrethanat e incidentit.
Ky nuk është rasti i parë që “Krushik” bëhet vatër aksidentesh të njëpasnjëshme. Vetëm në dy vitet e fundit, kjo është ngjarja e pestë e tillë.
Më 3 gusht 2024, po në të njëjtin repart, ndodhi një tjetër shpërthim ku tre persona u lënduan. Ndërkohë, në vitin 2022 dhe 2023 janë shënuar të paktën tre raste të tjera me punëtorë të lënduar nga shpërthime apo defekte teknologjike.
Pavarësisht frekuencës së këtyre ngjarjeve, fabrika “Krushik” ka mbetur e heshtur për shkaqet konkrete. Në faqen zyrtare publikohen vetëm njoftime të shkurtra, pa detaje për hetime, përgjegjësi apo masa të marra.
Banorët lokalë dhe familjarët e punëtorëve po shprehin shqetësim serioz për sigurinë në këtë kompleks ushtarak, ndërsa mungesa e transparencës vetëm sa e shton pasigurinë.
