Përfaqësuesja e lartë e Bashkimit Evropian, Kaja Kallas, përmbylli pjesën e dytë të vizitës së saj në Ballkanin Perëndimor, duke theksuar rëndësinë strategjike të rajonit për BE-në dhe duke e quajtur procesin e zgjerimit “projektin më të rëndësishëm gjeopolitik dhe një prioritet personal” për të.
Gjatë vizitave në Kosovë, Serbi dhe Maqedoninë e Veriut, Kallas përcolli mesazhe të qarta: për Serbinë tha se “kërkova që autoritetet të përshpejtojnë reformat dhe të përcaktojnë qartë drejtimin strategjik të vendit drejt BE-së, përmes rikthimit të besimit dhe përkushtimit ndaj parimeve demokratike”.
Ajo theksoi se “bisedova edhe me të rinj dhe përfaqësues të shoqërisë civile, të cilët kërkuan drejtësi dhe përgjegjësi – zëri dhe energjia e tyre janë thelbësore për të ecur përpara“.
Sa i përket Kosovës, Kallas apeloi që “liderët duhet të lënë ndarjet anash dhe të vendosin në plan të parë të ardhmen e Kosovës“.
Për Maqedoninë e Veriut, ajo tha se “Maqedonia e Veriut i përket familjes evropiane dhe tani është thelbësore të vazhdohet në rrugën drejt BE-së“.
Kallas gjithashtu përmendi rëndësinë e Partneritetit për Siguri dhe Mbrojtje me BE-në dhe Planit të Rritjes për Ballkanin Perëndimor.
