Ish-ambasadorja e Kosovës në Shtetet e Bashkuara të Amerikës, Vlora Çitaku i ka reaguar zëvendësministrit të Pushtetit Lokal, Arbër Vokrri, i cili e ka akuzuar palën ndërkombëtare se ka nxitur trazirat në veri në disa situata.
Përmes një postimi në Facebook, Çitaku u shpreh se ky zyrtar i VV’së e përfaqëson një politikë që i shërben vetëm vetes.
“Ky zyrtar, një eksponent tipik i një qasjeje që sheh armiq të brendshëm e të jashtëm kudo, nuk përfaqëson as interesin qytetar, as vizionin për shtetndërtim. Ai përfaqëson një politikë që i shërben vetëm vetes, një politikë që prodhon tension, jo zgjidhje, izolim, jo bashkëpunim.”
“Kur dëgjon deklarata të tilla, nuk është e vështirë të kuptosh pse Kosova sot është më e izoluar se kurrë më parë…”, ka shkruar tutje Çitaku.
