Zgjimi me dhimbje koke është një problem që prek shumë njerëz dhe mund të ndikojë në mënyrën se si e nisin ditën. Edhe pse në disa raste mund të jetë pasojë e mungesës së gjumit ose dehidratimit, dhimbjet e përsëritura në mëngjes mund të lidhen edhe me probleme të tjera shëndetësore.
Sipas ekspertëve shëndetësorë, një nga shkaktarët e mundshëm është apnea obstruktive e gjumit, një çrregullim gjatë të cilit frymëmarrja ndërpritet për periudha të shkurtra gjatë natës. Kjo mund të shkaktojë ulje të cilësisë së gjumit dhe dhimbje koke pas zgjimit.
Ndër arsyet e tjera përfshihen pagjumësia, gjumi i pamjaftueshëm, gërhitja, konsumimi i alkoolit, dehidratimi dhe kërcitja e dhëmbëve gjatë natës.
Edhe migrena mund të shfaqet në orët e para të mëngjesit, ndërsa te disa persona dhimbja mund të lidhet me tensionin e lartë të gjakut ose përdorimin e shpeshtë të barnave kundër dhimbjeve.
Mjekët rekomandojnë që personat që zgjohen shpesh me dhimbje koke të mos e neglizhojnë këtë simptomë, por të kërkojnë vlerësim mjekësor për të identifikuar shkakun.
Nëse dhimbja shfaqet papritur dhe është jashtëzakonisht e fortë, ose shoqërohet me dobësi të njëanshme, çrregullime të të folurit, humbje të shikimit, konfuzion apo temperaturë me ngurtësim të qafës, kërkohet ndihmë urgjente mjekësore.
Identifikimi i shkakut është i rëndësishëm, pasi trajtimi varet nga problemi që qëndron pas dhimbjes.
