Rreth 600,000 njerëz marshuan këtë të shtunë në Londrën qendrore për të përkujtuar 77-vjetorin e Nakba, duke mbajtur një nga protestat më të mëdha pro-palestineze që nga nëntori i vitit 2023.
Demonstrata filloi në Embankment, kaloi pranë Big Ben dhe përfundoi përpara selisë së kryeministrit britanik në Downing Street. Protestues nga e gjithë Mbretëria e Bashkuar, përfshirë Uellsin dhe Anglinë Veriore, morën pjesë në këtë marshim masiv.
Ngjarja u organizua nga një sërë grupesh, përfshirë Palestine Solidarity Campaign, Friends of Al-Aqsa, Muslim Association of Britain, Stop the War Coalition, Palestinian Forum in Britain dhe organizata të tjera.
Sipas Stop the War, protesta kishte për qëllim të kujtonte “Nakban e vitit 1948 dhe të kërkonte veprim urgjent nga qeveria britanike për t’i dhënë fund spastrimit etnik të vazhdueshëm të palestinezëve nga toka e tyre”.
Nakba (që në arabisht do të thotë “katastrofë”) i referohet shpërnguljes së detyruar të mbi 700,000 palestinezëve gjatë krijimit të shtetit të Izraelit në vitin 1948 nga milicitë sioniste, një ngjarje që për palestinezët shënon fillimin e humbjes së tokës së tyre dhe vuajtjeve që vazhdojnë ende sot.
