I dërguari i presidentit amerikan, Donald Trump, për luftën në Ukrainë, Keith Kellogg, mohoi pretendimet se ai kishte propozuar ndarjen e shtetit ukrainas.
Gazeta britanike The Times raportoi se Kellogg kishte sugjeruar në një bisedë që forcat britanike dhe franceze të merrnin kontrollin mbi perëndimin e Ukrainës si pjesë e “forcave për sigurimin e stabilitetit”, ndërsa ushtria ruse do të qëndronte në lindje. Thuhet se ai kishte deklaruar se kjo “mund të ngjante me ndarjen e Berlinit pas Luftës së Dytë Botërore”.
Më pas, Kellogg ka reaguar në platformën X duke pohuar se fjalët e tij ishin “keqinterpretuar”.
“Kam folur për forca që do të mbështesnin sovranitetin ukrainas pas një armëpushimi. Nuk kam folur për ndarjen e Ukrainës”, pohoi ai.
Ndryshe, as Shtëpia e Bardhë dhe as Kievi zyrtar nuk e komentuan këtë shkrim të gazetës britanike.
