Neni 30 dhe 31 i Ligjit të ri për Shtetësinë, që po iu mundësojnë banorëve që ishin shtetas të Kosovës deri më 1 janar të vitit 1998 të rikthejnë shtetësinë e tyre, janë bërë kauzë për Lëvizjen Revolta.
Ky grup po pretendon se një numër i madh i serbëve kanë shfrytëzuar këtë ligj të ri për ta kthyer shtetësinë e Kosovës, shkruan Insajderi.
Organizatorët e kësaj proteste sot paraqitën kërkesa kryesore: publikimin e numrit të aplikimeve dhe shtetësive të fituara nga shtetasit e Serbisë sipas ligjit për shtetësinë, shfuqizimin e Ligjit nr. 10/L-023 për Shtetësinë e Republikës së Kosovës dhe shfuqizimin e nenit 155 të Kushtetutës së Republikës së Kosovës.
Kush është Lëvizja Revolta?
Ky grup përbëhet nga një numër i të rinjve, të cilët pretendojnë se elita aktuale politike nuk përfaqëson dinjitetshëm kërkesat e qytetarëve.
Prezente nëpër rrjete sociale, në postimin e parë të tyre ata para zgjedhjeve të 7 qershorit ata bënin thirrje që nëpër fletëvotime të mbishkruhej “REVOLTË”.
“Ne Lëvizja Revolta, jemi të bindur që kjo elite politike nuk na përfaqëson më. Interesat e popullit asnjëherë nuk u përfaqësuan nga asnjë sujbekt politik. Prandaj, bëjmë thirrje te çdo qytetar që më datën 7 qershor 2026 të dalë në votim, por në fletën e votimit ta shënojë “REVOLTË”, si shenjë revolte të brendshme për të kundërshtuar çdo të keqe në këtë vend“, thuhet në postimin e tyre të parë.
Ndonëse nuk figurojnë të regjistruar si organizatë jo-qeveritare, ata kishin organizuar edhe aksion simbolik para MPB’së për aplikimet për shtetësi në qershor të këtij viti.
“Nuk ka shtet pa llogaridhënie”, “Heshtja e ministrisë është alarm”, “Institucionet nuk janë pronë private”, thuhej në pankartat e tyre.
Të njëjtit sot gjatë protestës iu drejtuan deputetit të PDK’së Bedri Hamza dhe deputetit tjetër Enver Hoxhajt, duke iu thënë “turp duhet t’ju vijë”.
