Kongresisti amerikan Joe Wilson ka shprehur shqetësim të thellë për përshkallëzimin e krizës politike dhe tensioneve në Shqipëri, duke i bërë thirrje publike autoriteteve qeveritare që të ndalin përdorimin e forcës ndaj pjesëmarrësve në tubime.
Përmes një reagimi të drejtpërdrejtë në rrjetin social X, zyrtari i lartë amerikan nënvizoi rëndësinë e të drejtave demokratike dhe nevojën për llogaridhënie institucionale në vend.
“Po ndjek me shqetësim të madh përshkallëzimin e krizës në Shqipëri, aleate e NATO-s. Populli shqiptar meriton liri, sundim të ligjit dhe llogaridhënie institucionale. Qeveria duhet të përmbahet nga çdo lloj dhune ndaj protestuesve. Të rinjtë meritojnë të kenë zë në të ardhmen e vendit të tyre“, deklaroi Wilson.
Deklarata e kongresistit amerikan vjen në një moment kur trazirat dhe përplasjet mes protestuesve dhe forcave të rendit në Tiranë kanë nxitur vëmendjen e partnerëve ndërkombëtarë.
