Analisti i futbollit Liridon Leci dyshohet se e ka kapur për fyti dhe e ka goditur në fytyrë ish-futbollisten Edonisa Aliu, të dielën në mbrëmje, pas përfundimit të emisionit “Dueli Sportiv”.
Sipas një raporti të Policisë së Kosovës, incidenti ka ndodhur në objektin e RTV Dukagjinit në Shkabaj, ndërsa rasti po hetohet nga Stacioni Policor në Obiliq.
Në raportin fillestar të policisë thuhet se Aliu, e cila e ka paraqitur rastin në polici, është ofenduar me fjalë fyese nga Leci, i cili më pas dyshohet se e ka sulmuar.
Sipas raportit, në momentin e incidentit kanë qenë të pranishëm anëtarë të stafit dhe mysafirë të emisionit, përfshirë moderatorin Ndrecë Gjonaj dhe analistin e futbollit Faruk Statovci.
Raporti bën të ditur gjithashtu se Aliu ka marrë trajtim mjekësor në Qendrën e Mjekësisë Familjare në Obiliq.
Përplasja mes Lecit dhe Aliut, sipas të njëjtit raport, ka vazhduar edhe verbalisht në parkingun e televizionit RTV Dukagjini.
Rasti është nën hetim nga organet kompetente.
