Dy politikanë me prejardhje shqiptare, Arbër Gashi dhe Aida Birinxhiku, janë pranë sigurimit të mandatit të ri në Parlamentin e Suedisë, pas zgjedhjeve parlamentare të së dielës.
Të dy garuan në listën e Partisë Socialdemokrate për qarkun e Hallandit. Gashi ishte i dyti, ndërsa Birinxhiku e treta në listën e kandidatëve.
Sipas rezultateve paraprake, Socialdemokratët kanë siguruar tri mandate në Halland, duke i vendosur dy kandidatët shqiptarë në pozitë të favorshme për të vazhduar përfaqësimin e tyre në parlament.
Megjithatë, mandatet ende nuk mund të konsiderohen përfundimtare. Autoritetet suedeze pritet të vazhdojnë numërimin e votave të parakohshme, votave të ardhura me vonesë dhe atyre nga qytetarët suedezë që jetojnë jashtë vendit.
Për këtë arsye, rezultati përfundimtar pritet të konfirmohet të mërkurën, ndërsa ndarja e mandateve mund të pësojë ndryshime.
Arbër Gashi është aktualisht deputet i Socialdemokratëve për qarkun e Hallandit, ndërsa Aida Birinxhiku ka shërbyer gjithashtu si deputete e këtij qarku.
Në nivel kombëtar, zgjedhjet në Suedi janë karakterizuar nga një rezultat tejet i ngushtë. Sipas rezultateve paraprake, blloku opozitar i udhëhequr nga Magdalena Andersson kishte 176 mandate, kundrejt 173 mandateve të bllokut qeverisës të kryeministrit Ulf Kristersson, nga gjithsej 349 ulëse në parlament.
Rizgjedhja e mundshme e Gashit dhe Birinxhikut do të ishte një tjetër sukses i rëndësishëm për përfaqësimin shqiptar në institucionet suedeze.
Rezultati përfundimtar pritet të qartësojë nëse dy shqiptarët do të vazhdojnë mandatin e tyre në Parlamentin suedez.
