Nga Ismet Haziri
Si qytetar i Prishtinës, qytetar i Kosovës dhe ndërmarrës që punëson 16 punëtorë, e shoh me shqetësim të madh bllokimin e një donacioni që do të ndihmonte në zgjidhjen e problemit të mbeturinave në kryeqytet.
Nëse marrëveshja nuk është nënshkruar për arsye ligjore apo procedurale, qytetarët meritojnë një shpjegim të qartë. Por nëse pas këtij bllokimi qëndrojnë përplasjet politike, atëherë kjo është e papranueshme.
A mund të lejojmë që një kryeqytet me qindra mijëra banorë të vuajë për shkak të rivaliteteve politike?
Prishtina nuk është pronë e asnjë partie dhe as e asnjë politikani. Ajo është kryeqyteti i Republikës së Kosovës. Çdo ditë këtu jetojnë, punojnë, studiojnë dhe marrin shërbime qytetarë nga e gjithë Kosova.
Kur dëmtohet Prishtina, dëmtohet e gjithë Kosova.
Prandaj, institucioneve u bëj një thirrje të thjeshtë: mos e bllokoni zgjidhjen e problemeve të qytetarëve për shkak të politikës.
Nëse ka pengesë, shpjegojeni. Nëse ka përgjegjës, tregojini. Nëse ka zgjidhje, zbatojeni.
Qytetarët nuk kërkojnë luftë politike. Kërkojnë punë, përgjegjësi dhe një Prishtinë të pastër.
Prishtina nuk duhet të jetë peng i politikës. Duhet të jetë prioritet i shtetit.
