Shefi i Grupit Parlamentar të AAK-së, Besnik Tahiri, ka paralajmëruar se bizneset në Kosovë janë në prag kolapsi për shkak të çmimeve të larta të naftës dhe detyrimeve fiskale, duke kërkuar nga Qeveria uljen e akcizës dhe TVSH-së për karburantin.
Tahiri ka theksuar se çdo ditë pa veprime konkrete po i shtyn ndërmarrjet drejt mbylljes dhe rrezikon mijëra vende pune. Ai shtoi se përpjekjet e Qeverisë për të kontrolluar çmimet duke detyruar bizneset të shesin me humbje nuk janë zgjidhje.
Sipas Tahirit, përvoja e Ukrainës gjatë krizave dhe modeli i Japonisë me rezerva shtetërore tregojnë mënyrën e duhur për të vepruar në situata të tilla ekonomike.
Ai kërkoi lirimin e menjëhershëm të së paku 8 centëve nga TVSH-ja dhe heqjen e akcizës për naftën deri në stabilizimin e situatës, duke paralajmëruar se pa këtë ndërhyrje një valë mbylljesh biznesesh dhe humbjesh të vendeve të punës është e pashmangshme.
Postimi i plotë:
Punëdhënësit dhe sidomos bizneset në vend janë në prag KOLAPSI, rrjedhimisht ekonomia e vendit në tërësi. Shteti funksional është në rrezik.
PSE?
Çmimi i naftës dhe obligimet fiskale janë bërë të papërballueshme për secilin punëdhënës. Çdo ditë pa veprime konkrete në këtë situatë të pazakontë po i shtyn ndërmarrjet drejt mbylljes dhe po rrezikon mijëra vende pune.
Kjo qeveri po përpiqet të “luftojë” çmimet duke i detyruar bizneset të shesin me humbje. Kjo nuk është zgjidhje, por është recetë për falimentim.
Shtetet serioze nuk bëjnë populizëm me çmime artificiale.
ATO:
– ulin përkohësisht akcizën dhe TVSH-në
– subvencionojnë sektorët kritikë
– krijojnë rezerva strategjike shtetërore
– targetojnë ndihmën direkt te qytetarët
Përvoja nga Ukraina gjatë krizave të fundit dhe modeli i Japonisë me rezerva për afro një vit tregojnë qartë se si duhet vepruar.
Ndërkohë, tek ne kërkesa është minimale dhe urgjente:
– Lirimi i menjëhershëm i së paku 8 centëve nga TVSH-ja
– Heqja e akcizës për naftën, deri sa të stabilizohet situata.
Pa këtë ndërhyrje, një valë mbylljesh biznesesh dhe humbjesh të vendeve të punës është e pashmangshme.
Ironia është e madhe: nga njëra anë mburremi me rritje të të hyrave buxhetore, nga ana tjetër po e mbytim sektorin që i gjeneron ato.
Kjo nuk është menaxhim ekonomik, është një iluzion i rrezikshëm që do të paguhet shtrenjtë nga qytetarët.
Veproni sot. Nesër mund të jetë vonë.
