Sportingu i Lisbonës ka arritur një nga përmbysjet më të mëdha në historinë e garave evropiane, duke eliminuar FK Bodo/Glimt pas një fitore bindëse 5-0 pas vazhdimeve, për t’u kualifikuar në çerekfinalen e Champions League.
Skuadra portugeze e kishte humbur ndeshjen e parë me rezultat 3-0, por ka arritur të përmbysë gjithçka në ndeshjen e kthimit, duke kaluar tutje me rezultat të përgjithshëm 5-3.
Ndeshja ka nisur me presion të madh nga vendasit, të cilët kanë krijuar disa raste të mira që në minutat e para.
Goli i parë ka ardhur pas rreth tridhjetë minutash lojë, kur Gonçalo Inacio ka shënuar me kokë pas një goditje nga këndi.
Në pjesën e dytë, Pedro Gonçalves ka realizuar për 2-0, duke rikthyer shpresat e Sporting për kualifikim. Më pas, një penallti e fituar pas ndërhyrjes së VAR është shndërruae në gol nga Luis Suarez, duke barazuar rezultatin e përgjithshëm.
Në vazhdime, Maximiliano Araujo ka shënuar golin vendimtar për përmbysjen, ndërsa Rafael Nel e ka vulosur fitoren me golin e pestë.
Kjo është hera e parë që Sporting përmbys një disavantazh prej tri golave në një garë evropiane që nga sezoni 1963/64. Ndërkohë, FK Bodo/Glimt e ka humbur shansin për të qenë skuadra e parë norvegjeze që arrin në çerekfinale të Champions League pas gati tre dekadash.
Sporting bëhet një nga skuadrat e rralla që realizojnë përmbysje të tilla historike, duke kujtuar edhe rikthimin e famshëm të Liverpool ndaj Barcelonës në vitin 2019.
