Dogana e Kosovës sot e ka zhvilliuar një aksion në rajonin e Prishtinës, ku ka arritur të konfiskojë mallra që dyshohet se janë të kontrabanduara dhe kapin vlerën rreth 800 mijë euro.
Në njoftim thuhet se ky aksion është bazuar në autorizimet ligjore që burojnë nga Kodi Doganor dhe i Akcizave i Republikës së Kosovës.
Gjatë operacionit, zyrtarët doganorë kanë kryer kontrolle në pesë lokacione të ndryshme, kryesisht depo të bizneseve.
“Nga kontrollet është zbuluar një sasi e konsiderueshme e mbathjeve sportive me marka të ndryshme të mbrojtura, si dhe një sasi veshjesh tekstili. Sipas autoriteteve, mallrat e gjetura dyshohet se nuk posedojnë dokumentacionin e nevojshëm për origjinën dhe zhdoganimin e rregullt në Republika e Kosovës. Pas evidentimit të rastit, është njoftuar prokurori kujdestar nga Prokuroria Themelore në Prishtinë, i cili ka autorizuar ndërmarrjen e veprimeve të mëtejme procedurale. Personat e dyshuar lidhur me pronësinë e mallit janë duke u intervistuar, ndërsa mallrat janë duke u inventarizuar dhe konfiskuar për t’u transportuar në depot e Doganës së Kosovës. Autoritetet theksojnë se Dogana e Kosovës mbetet e përkushtuar në luftimin e kontrabandës dhe në mbrojtjen e tregut të ligjshëm në vend”, thuhet në njoftim.
