Avokati Besnik Berisha ka reaguar përmes një postimi publik lidhur me çështjen e zgjedhjes së Presidentit, duke theksuar se kjo pozitë nuk duhet të kthehet në “formalitet të një shumice të vetme”.
Ai ka deklaruar se, po të ishte në krye të Lidhja Demokratike e Kosovës, nuk do të lejonte që zgjedhja e Presidentit të bëhej pa konsensus të gjerë politik.
Sipas tij, në mungesë të një propozimi konsensual – qoftë për Vjosa Osmani apo për një emër tjetër që bashkon – Grupi Parlamentar i LDK-së nuk do të duhej të krijonte kuorum për një kandidat partiak.
“Presidenti nuk është pozitë teknike. Ai është garancia e balancave,” ka theksuar Berisha, duke paralajmëruar se koncentrimi i pushteteve në duart e një subjekti të vetëm përbën rrezik afatgjatë për demokracinë.
Ai gjithashtu ka përmendur mundësinë e rikthimit të Osmanit në LDK apo një bashkëpunim politik përmes GUXO, duke thënë se një bashkim i energjive të qendrës do të rikthente elektoratin e larguar dhe do të krijonte balancë reale politike.
Në fund, Berisha ka bërë thirrje që LDK të reflektojë dhe të veprojë me maturi, duke theksuar se “kësaj radhe nuk guxon të gabojë”, ndërsa ka apeluar për tejkalimin e gabimeve të së kaluarës në të mirë të demokracisë dhe të ardhmes së vendit.
