Ditën e sotme pritet të zhvillohet seanca e radhës gjyqësore në procesin penal ndaj Endrit Nikës, i cili akuzohet për vrasjen e të dashurës së tij, shtetases argjentinase me inicialet M.K.U.
Ngjarja tragjike kishte ndodhur në një hotel në Fushë-Kosovë.
Sipas aktakuzës së Prokurorisë, i pandehuri Endrit Nika, pas një mosmarrëveshjeje të mëparshme me viktimën dhe me qëllim që ta privonte nga jeta, kishte nxjerrë kornizën e dritares dhe e kishte hedhur viktimën nga dritarja e dhomës së hotelit, nga kati i gjashtë.
Si pasojë e rënies, viktima kishte pësuar lëndime të rënda trupore dhe, pavarësisht trajtimit mjekësor të ofruar, kishte ndërruar jetë në Qendrën Klinike Universitare të Kosovës (QKUK).
Prokuroria vazhdon të qëndrojë në pozicionin se Endrit Nika e ka hedhur viktimën nga kati i gjashtë i hotelit, duke e cilësuar këtë rast si vrasje të kryer me dashje.
