Trupi i pajetë i Stefanie Pieper, influencuese austriake 31-vjeçare e zhdukur prej gati një jave nga Graz, është gjetur në një zonë pyjore pranë Mariborit, në Slloveni.
Sipas mediave lokale, drejtuesit e hetimit janë çuar në vendin e ngjarjes nga ish-partneri i saj, i cili konsiderohet si i dyshuari kryesor lidhur me vdekjen e saj dhe që gjatë orëve të fundit ka pranuar përfshirjen në zhdukjen e saj.
Sipas të njëjtave burime, ai e ka vrarë ish-të dashurën duke e mbytur, më pas ka futur trupin e saj në një valixhe dhe e ka groposur në një zonë pyjore përtej kufirit, në territor slloven.
31-vjeçarja ishte zhdukur rreth një javë më parë. Kontakti i fundit daton ditën e zhdukjes, kur ajo i kishte dërguar dy mesazhe një mikeje, duke i treguar në njërin prej tyre për praninë e një figure të dyshimtë në shkallët e pallatit të saj. Që nga ai moment, gjurmët e saj u zhdukën.
I dyshuari kryesor u arrestua të hënën e kaluar në Slloveni, pranë kufirit me Austrinë, afër makinës së tij që ishte gjetur e djegur. Të premten ai u ekstradua në Austri dhe u mor në pyetje nga hetuesit e Stirisë, para të cilëve përfundimisht vendosi të bashkëpunojë, duke treguar edhe vendin ku ndodhej trupi i gruas.
Hetimet po vazhdojnë paralelisht edhe ndaj dy të dyshuarve të tjerë, vëllait dhe njerkut të burrit, të arrestuar në Graz dhe aktualisht në paraburgim për shkak të rrezikut të prishjes së provave. Të dy, deri më tani, kanë refuzuar të japin deklarata përpara hetuesve.
Detaje të tjera pritet të publikohen nga policia dhe prokuroria sllovene, të cilat po bashkëpunojnë ngushtë me autoritetet austriake për të finalizuar rindërtimin e plotë të ngjarjes.
