Granit Xhaka ka dhënë një intervistë të gjatë për mediumin zviceran “Blick”, ku ka folur për shumë tema, përfshirë suksesin e tij te Sunderlandi, planet me përfaqësuesen e Zvicrës dhe zhvillimet te futbollistët që kanë zgjedhur Kosovën, si Leon Avdullahu dhe Albian Hajdari.
Kapiteni i Zvicrës ka lënë të kuptohet se vendimi i Avdullahut dhe Hajdarit ishte i bazuar në mundësinë për të siguruar një vend startues te Zvicra.
“Lojtarët me cilësi të tilla përfundimisht nuk janë diçka prej të cilës dëshiron të heqësh dorë. Nga perspektiva e tyre ka të bëjë me të qenit në gjendje të vlerësimit të statusit të tyre. A do t’ia dilnin të siguronin një vend startuesi te Zvicra brenda tri apo katër vjetësh? Kam dyshime për këtë, duke konsideruar se kush nuk po luan ende për ne, por është dukshëm më përpara në karrierë. Ardon Jashari është me ne për tri vjet dhe ka bërë vetëm katër paraqitje”, tha Xhaka.
Ai theksoi se Avdullahu nuk është ende në nivelin e Ardon Jasharit, lojtarit të Milanit.
“A është Leoni më përpara se Ardoni? Nuk mendoj kështu. Por ai është një lojtar i mirë, përndryshe nuk do të luante çdo ndeshje për Hoffenheimin. Ndoshta i mungonte pak durimi në lidhje me Zvicrën. Por në fund të fundit është vendimi i tyre të luajnë për Kosovën, që tani po paraqitet në nivel shumë të lartë”, shtoi Xhaka.
Zvicra udhëheq grupin e saj, duke pasur tri pikë më shumë se Kosova. Në ndeshjen e fundit mes dy përfaqësueseve, Zvicra fitoi 4:0. Xhaka ka treguar se është i përgatitur për sfidën vendimtare në Prishtinë, por synon fillimisht biletën për Botëror ndaj Suedisë:
“Nëse e kryejmë punën tonë me Suedinë, nuk do të vijë tek ajo. Dhe nëse përfundojmë me finale në Prishtinë, atëherë le të jetë kështu. Ne do ta pranojmë situatën. Nuk do të jetë hera e parë që garojmë atje”, tha ai.
Kapiteni i Zvicrës foli edhe për mungesën e partnerit të tij në mesfushë, Remo Freuler, në dy ndeshjet e ardhshme, duke theksuar se është kurioz të shohë se kë do të caktojë selektori Murat Yakin në vend të tij.
Xhaka gjithashtu lavdëroi tifozët e Sunderlandit, duke përmendur ndeshjen ndaj Chelseat:
“Në udhëtim kundër Chelseat dëgjoheshin vetëm ata. Ata janë tifozë të vërtetë, jo turistë. Nuk janë në qytet rastësisht, Sunderlandi është jeta e tyre. Pavarësisht nëse janë 80 apo 5, ata e dinë pse janë në stadium. Ata na kanë përkrahur me intensitet të jashtëzakonshëm që nga ndeshja e parë”.
Ai ka thënë se ka arritur si lider i pakontestueshëm në Sunderland dhe në Zvicër.
“Arrita në skuadër si emër i madh. Pritjet ishin të mëdha. Ishte sfida më e madhe në karrierën time, jo vetëm për mua, por edhe për familjen time. Secili moment këtu ia ka vlejtur”.
Xhaka theksoi se është krenar për krahasimet që po i bëhen dhe i përkushtuar të luajë në Botërorin 2026.
“Unë, Freuleri dhe Rodrigezi jemi në moshë që ndoshta mund ta luajmë Botërorin e fundit. Nëse do të jemi në gjendje fizike që të garojmë në vitin 2030, është pikëpyetje. Për këtë arsye e dua patjetër biletën për Botërorin 2026”, përfundoi ai.
